Nesër në Kosovë pritet të mbajë mot mjaft i nxehtë, me intervale kohore me diell, vranësira kalimtare-lokale dhe erëra të nxehta jugperëndimore. Pasdite vonë në veri të vendit dhe lokalisht edhe në ndonjë rajon tjetër priten rrebeshe të izoluara shiu me vetëtima, bubullimë dhe mundësi edhe për breshër. Po ashtu pasdite vonë ose në mbrëmje do të fillojnë të fryjnë erëra të freskëta nga verilindja.
Në Shqipëri, Maqedoninë Veriore dhe Luginë nesër pritet të mbajë mot kryesisht me diell dhe shumë i nxehtë. Edhe në jug të Malit të Zi nesër mjaft nxehtë, ndërsa në veri me rrebeshe shiu dhe breshër.
Të mërkurën na pret mot i ndryshueshëm dhe më i freskët në Kosovë dhe viset tjera kontinentale. Vende-vende priten rrebeshe të fuqishme shiu me vetëtima dhe bubullimë sidomos në Mal të Zi dhe rajonet në Kosovë dhe Shqipëri jo shumë larg Malit të Zi. Në viset tjera mund të ketë rrebeshe sporadike, por shumica e territorit ende mbetet pa reshje.
Nga e enjta na pret mot me intervale të gjata kohore me diell dhe vranësira lokale. Rrebeshet e izoluara zhvendosen në Maqedoni dhe juglindje të Shqipërisë. Temperaturat pas uljes afatshkurtër pritet të rriten përsëri në mënyrë graduale./Meteoballkan
