Nesër në Kosovë na pret mot plotësisht i vranët dhe me reshje shiu. Vende-vende, herë pas here priten reshje të dendura shiu dhe rrebeshe lokale shiu me vetëtima dhe bubullimë. Temperatura maksimale pritet të arrijë deri në 16 gradë Celsius.
Në Shqipëri nesër pritet të mbajë mot plotësisht i vranët dhe me reshje të dendura shiu. Herë pas here priten rrebeshe të fuqishme shiu me vetëtima dhe bubullimë dhe reshje të rrëmbyeshme shiu të cilat mund të qojnë në përmbytje lokale.
Edhe në Mal të Zi, Maqedoninë Veriore dhe Luginën e Preshevës nesër pritet të mbajë mot plotësisht i vranët dhe me reshje shiu. Reshjet e shiut nganjëherë do të jenë mjaft intensive dhe priten edhe në formë të rrebesheve të fuqishme lokale me vetëtima dhe bubullimë.
Të hënën ulje e temperaturave. Reshjet e shiut do të shndërrohen në reshje bore në viset kodrinore-malore të Kosovës dhe në viset malore të rajonit po ashtu. Ka gjasa që reshje kalimtare bore të paraqiten edhe në disa vise më të ulëta të Republikës së Kosovës. Erërat do të ndryshijnë drejtim dhe do të fryjnë nga veriu dhe verilindja. Reshjet e shiut ende do të vazhdojnë në disa vise të Shqipërisë në formë të rrebesheve lokale, ndërsa pritet që gradualisht të pushojnë.
Të martën erërat do të fillojnë përsëri të fryjnë nga jugu dhe kjo do të jetë shenjë e afrimit të një cikloni të ri nga Italia. Pasdite reshjet e shiut do të rifillojnë në Shqipëri dhe Mal të Zi ndërsa gjatë natës edhe në Kosovë dhe Maqedoninë Veriore. Të mërkurën stabilizim gradual i motit, por ende mund të ketë riga lokale shiu./MeteoBallkan