Ura mbi lumin Drini është mbyllur për qarkullim, shkaku i dëmtimeve të rënda që ka pësuar nga vërshimet e vitit të kaluar dhe këto të kësaj jave, duke lënë kështu të izoluar Rogovën e Hasin.
Pamje nga ura e bllokuar ka publikuar Teki Shala, i cili ka qenë kandidat për Kryetar të Gjakovës nga radhët e LDK’së, në zgjedhjet e fundit komunale. Sipas tij, vendimi për bllokimin e urës është marrë sot pasdite nga Kuvendi Komunal i Gjakovës.
Shala ka fajësuar autoritetet komunale dhe qeveritare për këtë gjendje.
“Sot pasdite Kuvendi i Komunës së Gjakovës ka mbyllur për qarkullim Urën mbi Dri si rrezultat i dëmtimit të rëndë që ka pësuar nga vërshimet e vitit të kaluar dhe tash së fundi. Pra sot rajoni ynë është i mbyllur për qasje në pjesën tjetër të botës, sepse edhe rruga që lidhet me rrugën regjionale te Ura Fshejt është e mbyllur përshkak të dëmtimeve që ka pësuar së fundi. Pra praktikisht ne jemi të izoluar si rrezultat i papërgjegjshmërisë së autoriteteve komunale dhe qeveritare. Ju njoftoj se deri me tani asnjë veprim konkret nuk është ndërmarrë për ndërtimin e kësaj ure. Pra as projekti nuk ka filluar të hartohet”, ka shkruar Shala në Facebook.
Pas bllokimit të kësaj ure, ka reaguar edhe deputeti i LDK’së, Avdullah Hoti. Ai ka thënë se në janar bëhen dy vite prej kur ura është dëmtuar nga vërshimet, por që deri tash s’ka pasur asnjë intervenim.
Sipas tij, ndërtimi i urës është paraparë të bëhet me buxhetin e vitit 2023, derisa e gatshme pritet të jetë në vitin 2025.
“Ura mbi Drinin e Bardhë në Rogovë sot është bllokuar për qarkullim. Në janar bëhen dy vite nga kur është dëmtuar nga vërshimet. Asnjë intervenim për dy vite. Tani e kanë paraparë në buxhetin e vitit 2023 të nisin ndërtimin, e ta përfundojnë në vitin 2025”, ka shkruar Hoti./Reporteri.net.
