Ajri i ftohtë polar është larguar tashmë dhe në Kosovë kanë filluar reshjet e shiut të cilat do të intensifikohen në mbrëmje dhe gjatë natës.
Edhe në Shqipëri ka reshje shiu, ndërsa në mbrëmje dhe gjatë natës reshje shiu do të ketë në tërë rajonin, vende-vende mjaft intensive dhe të dendura.
Reshje ekstreme shiu mund të bien në veri të Shqipërisë dhe jug të Malit të Zi, ndërsa reshje mjaft të dendura shiu priten edhe në vise tjera të Shqipërisë, Kosovës, Maqedonisë së Veriut e Luginën e Preshevës.
Gjatë orëve të vona të mbërmjes dhe natës priten intervale reshjesh mjaft të dendura shiu sidomos në rajonin e Pejës e rrethinë, pastaj Istog, Deçan, Klinë, Gjakovë, Drenicë, Fushë Kosovë, Prishtinë etj. Në këto rajone ka gjasa për vërshime kalimtare të shpeshta, por rajoni i Pejës e rrethinës mund të kenë më shumë probleme.
Në aspektin termik temperaturat do të shënojnë rritje graduale për shkak të rrymimeve të fuqishme ajrore nga jugu që po i kushtëzon cikloni mesdhetar.
Reshjet do të pauzojnë të enjtën dhe të premtën, edhe pse mund të ketë riga ose ndonjë rrebesh lokal shiu, por reshjet inntensive mund të kthehen përsëri për fundjavë, ngase do të kemi një tjetër ciklon i cili po ashtu do të kushtëzojë rrymime ajrore të ngrohta nga jugu gjatë kohës së reshjeve atmosferike./MeteoBallkan