Bizneset në Kosovë gjatë vitit që shkoi janë përballur me mungesë të kuadrove të kualifikuara. Kryetari i Odës Ekonomike, Lulzim Rafuna, ka thënë se shumë nga to detyrohen që të marrin punëtorë nga vendet si Nepali, Turqia dhe Bangladeshi. Shkak për këtë është edhe ikja e fuqisë punëtore nga Kosova. Në vitin 2021 u larguan mbi 42 mijë qytetarë, ndërsa për 2022-tën nuk ka të dhëna
Bizneset kosovare gjatë vitit që shkoi janë përballur me mungesë të punëtorëve dhe kuadrove të kualifikuara.
Mungesa e fuqisë punëtore, sipas kryetarit të Odës Ekonomike të Kosovës, Lulzim Rafuna, ka shtyrë shumë biznese që të riorganizohen dhe të blejnë pajisje të reja pune që të mos varen nga faktori njeri.
“Shumë kompani kanë filluar që të mendojnë dhe kanë filluar që të importojnë fuqi punëtore prej disa vendeve të tjera, siç janë Bangladeshi, Turqia, Nepali, mirëpo edhe ajo është sfidë më vetvete për arsye se nuk e kanë qëllim ata punëtorë që po vijnë të punojnë në Kosovë, mirëpo edhe derisa ta gjejnë mundësinë e parë për t’u larguar nga Kosova, çka nënkupton që Kosovën më shumë e shohin si një vend transit sesa një vend që do të rrinë e të punojnë më gjatë”, ka theksuar Rafuna.
Ikja e fuqisë punëtore ishte shqetësuese. Edhe pse nuk ka të dhëna për vitin 2022, sipas Agjencisë së Statistikave, gjatë vitit 2021, mbi 42 mijë qytetarë kanë ikur nga Kosova.
Kryetari i OEK-ut ka kërkuar nga ekzekutivi që të menaxhojë më mirë krizën ekonomike.
“Kriza ekonomike do të duhej të menaxhohej në një mënyrë më të mirë nga ana e ekzekutivit, për arsye se ish dashtë nga ekzekutivi të ndërmerret një paketë, e cila do të kishte mundësuar edhe biznesi, edhe qytetarët që të luftojnë inflacionin”, është shprehur Rafuna.
Shkalla e inflacionit në Kosovë gjatë 2022-s arriti në një mesatare prej 11 për qind, duke rënduar koston e qytetarëve.
