Acari i fortë siberik tanimë është larguar nga rajoni ynë, por ende kemi “mbetje” të ajrit polar i cili pritet të largohet definitivisht gjatë kësaj jave.
Nën ndikimin e fuqishëm anticiklonik nuk do të kemi reshje atmosferike për disa ditë me radhë, ndërsa temperaturat do të kenë tendencë rritjeje progresive. Ende gjatë netëve dhe mëngjeseve të ardshme pritet acar kryesisht i dobët, ndërsa në viset malore paksa më i fortë, por edhe kjo do të vijë duke u dobësuar.
Temperaturat në zonat e ulëta netëve të ardhshme mund të ulen deri në -5 gradë Celsius afërisht, ndërsa në disa zona malore (të rajonit) mund të shkojë deri në -10 edhe ndonjë natë.
Rritje më e ndjeshme e temperaturave do të ketë sidomos nga e mërkura ku ato maksimale mund të kalojnë mbi 10 gradë Celsius në viset kontinentale e mbi 15 gradë Celsius në viset mesdhetare, ndërsa ngricat e dobëta mëngjeseve të hershme do të vazhdojnë në disa zona kontinentale.
Pra, pas fluksit të ajrit siberik tani do të kemi masa më të ngrohta ajrore që vijnë nga Kontinenti evropian në drejtim të Ballkanit./MeteoBallkan
