Pas reshjeve të borës me intensitet të dobët deri mesatar të cilat priten gjatë kësaj nate, nesër gjatë ditës pritet që reshjet e borës të ndërpriten ose të shndërrohen në reshje të herëpashershme shiu. Kjo vjen si pasojë e një mase të ngrohtë ajrore në kuadër të ciklonit të fuqishëm Mesdhetar.
Në Kosovë nesër në mëngjes me reshje eventuale bore të cilat do të ndërpriten gjatë paraditës ku do të kemi ngritje të përkohshme të temperaturave.
Edhe në Shqipëri dhe Maqedoni nesër pritet ngritje relative e temperaturave. Në Shqipëri vende-vende priten rrebeshe shiu me vetëtima dhe bubullimë, kurse në Maqedoni reshjet do të jenë të pakta.
Në Mal të Zi nesër priten reshje të dendura atmosferike, në jug të vendit priten rrebeshe lokalisht të fuqishme shiu me vetëtima dhe bubullimë, kurse në veri të vendit priten reshje bore dhe shiu.
Të shtunën si në Kosovë, poashtu edhe në Shqipëri dhe Maqedoni do të kemi vranësira të dendura dhe reshje shiu gjatë ditës. Pasdite apo në mbrëmje në Kosovë pritet të rikthehen temperaturat e ulëta, erërat veriore dhe reshjet e shiut do shndërrohen në reshje herë pas here të dendura bore. Reshje bore priten edhe në veri dhe verilindje të Shqipërisë kurse në Mal të Zi, në jug priten stuhi të fuqishme me vetëtima dhe bubullimë kurse në qendër dhe veri priten stuhi të fuqishme dimërore. Reshjet e borës në Kosovë do të vazhdojnë gjatë natës në të dielën dhe pritet të ndërpritën të dielën në mëngjes ose paradite. Edhe në Kosovë kësaj radhe pritet të kemi shtresa disa cm. E diela do të jetë ditë e vërtetë dimërore me temperatura të ulëta dhe erëra të ftohta veriore. Meteoballkan.
