Ardhja e frontit të ftohtë në atmosferën shumë të nxehtë në vendin tonë sot në orët e pasdites mund të shkaktojë reagimin e bujshëm të atmosferës në Kosovë ku mund të krijimin e disa stuhive të fuqishme lokale me vetëtima, bubullimë dhe breshër.
Vende-vende do të ketë gjasa për shtrëngata mjaft të fuqishme që mund të jenë problematike, prandaj apelohet për kujdes të shtuar deri në orët e mbrëmjet kur pritet qetësim gradual i atmosferës.
Një sistem mjaft i fuqishëm me rrebeshe intensive dhe shkarkesa të forta atmosferike pritet që nga veriu e verilindja e Kosovës të depërtojë drejt pjesëve qendrore duke u rigjeneruar vazhdimisht dhe pastaj në drejtim të Dukagjinit. Sipas disa modeleve sistemi do të jetë më intensivi në veri-verilindje dhe qendër të Republikës së Kosovës, megjithatë çdo rajon mund të preket.
E tëra kjo situatë është normale kur kemi fronte të fuqishme që depërtojnë muajt e verës, por kujdesi duhet të jetë në nivelet më të larta sot orëve të pasdites, eventualisht të mbrëmjes.
Vende-vende mund të ndodhin stuhi mjaft intensive dhe po ashtu mund të ketë edhe breshër me përmasa të mëdha. Me ardhjen e frontit do të pasojë ulja e ndjeshme e temperaturave, ndërsa në mbrëmje ose natën fronti depërton në Shqipëri dhe priten disa stuhi lokale edhe atje.
Gjatë natës në Kosovë atmosfera do të qetësohet dhe priten mot i vranët, i freskët e me ndonjë reshje ose rrebesh lokal shiu. Do të vazhdojnë erërat mjaft të freskëta nga veriu./METEOBALLKAN
