Qarku i Kukësit, në 24 orët e fundit, është përfshirë nga reshje të dendura shiu në zonat e ulëta, si dhe reshje dëbore në zonat mbi 700 metra mbi nivelin e detit, ku në Shishtavec shkon deri në 30 centimetra dhe Valbonë deri në 5 centimetra.
Reshjet janë shoqëruar me erëra të forta, të cilat kanë lënë pa energji fshatrat e Njësisë Administrative Zapod, Shishtavec, Topojan, Bashkia Kukës. Si pasojë e reshjeve ka pasur rënie gurësh dhe bllokim turbinash në akset nacionale, ndërsa në akset turistike Kukës-Shishtavec dhe Bajram Curri-Valbonë, ka reshje dëbore. Kompanitë kontraktore po punojnë për mbajtjen funksionale të këtyre dy akseve nacionale dhe rrugëve të tjera.
Nga Bashkitë Kukës, Tropojë dhe Has, nuk ka raportime për ndonjë problematikë sa i përket emergjencave shëndetësore. Në Rrugën e Kombit, nga Morina deri në Tunelin e Kalimashit, lëvizja e mjeteve bëhet pa probleme. Në një njoftim të fundit, kompania e mirëmbajtjes së Rrugës së Kombit, ju bën thirrje drejtueseve të mjeteve që gjatë udhëtimit të kenë me vete pajisjet dhe gomat e dimrit, pasi pritet që rruga e kombit të përfshihet nga reshjet dëborës.
Kompania njoftoi se janë marrë të gjitha masat për kriposje, patrullim, mjete borëpastruese dhe për largimin e gurëve e inerteve në segmentet ku mund të ketë rënie të tyre në orët në vijim. Reshjet ndërkohë kanë rritur nivelin e liqenit të Fierzës. Niveli aktualisht është 284.97 metër, prurjet 250 m3/sek.
