Ciklone shumë të fuqishme po mbizotërojnë sonte rajonin e Skandinavisë, shteteve Baltike dhe Rusinë perëndimore.
Sistemet frontale nga këto masa potente ciklonike kanë arritur në Evropë dhe pritet të vijnë edhe në Ballkan në formë dukshëm më të dobësuar. Nga këto sisteme sot pati reshje bore në shumë pjesë të Gjermanisë, Polonisë, Austri, Zvicër. Sllovaki, Çeki, pastaj pjesë Hungarisë etj.
Në këto çaste kemi krijimin e një cikloni të dobët sekondar diku në Itali ose Detin Adriatik dhe një porcion reshjesh bore që krijohet diku në Kroaci, jug të Hungarisë, Rumani dhe Vojvodinë së bashku me frontin e ftohtë avancojnë në drejtim të jugut, gjegjësisht në drejtim të territoreve tona.
Gjatë natës reshje bore do të fillojnë edhe në territorin e Serbisë, Bosnjës dhe Hercegovinës dhe veriut të Malit të Zi, ndërsa orëve të hershme të mëngjesit fronti depërton në veri të Republikës së Kosovës me reshje lokale bore.
Gjatë mëngjesit të së martës fronti avancon në tërë territorin e Kosovës duke kushtëzuar reshje kalimtare bore. Nuk priten reshje të mëdha bore dhe nuk priten ndoshta në tërë territorin e Republikës, megjithatë vende-vende mund të kemi pamje mjaft të bukura orëve të mëngjesit, pamje që dhurojnë reshjet e borës.
Reshjet do të pushojnë orëve të paradites ose në mesdite, ndërsa pasdite priten intervale kohore me diell.
Fronti i ftohtë dobësohet edhe më shumë në Kosovë, prandaj shumë pak reshje bore priten në verilindje të Shqipërisë dhe aty-këto ndonjë fjollë bore në territorin e Maqedonisë së Veriut.
Temperaturat ulen pas frontit dhe në mbrëmje në Kosovë mund të kemi acar, megjithatë nuk pritet acar i fortë.
Pas këtij fronti nga e mërkura-enjta do të kemi depërtimin e masave të ngrohta ajrore që vijnë nga Mesdheu duke rritur temperaturat dhe po ashtu priten edhe reshje e rrebeshe të herëpashershme shiu./MeteoBallkan
