Masa të fuqishme ajrore me origjinë polare kanë përfshirë Evropen dhe Ballkanin duke shkaktuar reshje të dendura bore në shumë vise, madje edhe në disa vise të ulëta mbidetare. Pas reshjeve ekziston gjithnjë frika e kthjellimit dhe acarit të fortë polar që do të mund të shkaktonte dëme të konsiderueshme në kulturat e hershme pranverore dhe sidomos në pemëtari.
Po! është e vërtetë acari i fortë po vjen në Evropën qendrore dhe veriperëndim të Ballkanit, por jo në territoret tona, ngase viset tona do të jenë të mbuluara nga vranësirat në pjesën më të madhe të kohës, prandaj kemi shpresa se dëmet nuk do të jenë të mëdha. Megjithatë, rreziku ekziston mëngjesit së hënës, ngase në disa vise do të ketë kthjellime dhe në këto raste edhe detajet më të vogla vendosin nëse do të ketë acar ose jo.
Acar mjaft i fortë parashihet në rajonet e Alpeve evropiane dhe vendeve përreth edhe në zonat e ulëta si në Francë, Gjermani, Austri, Poloni etj., pastaj në Ballkan në Slloveni, Kroaci, Serbinë perëndimore dhe jugperëndimore, Bosnjë dhe Hercegovinë dhe veri të Malit të Zi. Fatmirësisht acari masiv do të pengohet të vije pikërisht në territoret tona, megjithatë në veri të Kosovës dhe vendet në kufi ose afër kufirit me Malin e Zi rrezikojnë me acar të vonshëm afatshkurtër. Gjithashtu edhe në të gjitha viset malore në Kosovë, Shqipëri dhe Maqedoninë Veriore ka rrezik për acar (afatshkurtër), por nuk do të zgjasë, ngase menjëherë të martën do të fillojnë të fryjnë erëra nga jugu/juglindja dhe vranësira të reja me reshje shiu do të përfshijnë viset tona dhe kjo do të jetë mburojë ose shpëtim nga acari i vonshëm.
Reshje shiu e bore sot kanë përfshirë gati të gjitha territoret tona. Të hënën përmirësim i motit, kurse reshje të reja shiu e rrebeshe priten të Martën./MeteoBallkan
