Anticikloni ruso-skandinav do të vazhdojë të mbizotëroi për shumë ditë në ato rajone duke ndikuar edhe në motin në viset tona. Është një gjendje tipike dimërore, por mungesa e ciklogjenezës dhe fuqia e madhe e masave ajrore të thata anticiklonike kushtëzon që i ftohti të kaloi pa reshje atmosferike, pra kemi të bëjmë me masa ajrore të ftohta dimërore, por për viset tona plotësisht të thata.
Në Mesdhe kemi një ciklon të dobët ngjitur me brigjet e Afrikes veriore, por shumë larg, ndërkohë një masë e fuqishme ciklonike do të depërtojë nga Atlantiku përmes Francës në Mesdhe, megjithatë edhe kjo nuk do të arrijë në viset tona ngase bllokada anticiklonike nuk do të lejojë një gjë të tillë.
Si pasojë në territoret tona ende nuk priten reshje dhe temperaturat nuk do të ndryshojnë aq. Do të vazhdojë acari i natës dhe mëngjesit dhe kthjelltësia e ditës e përcjellur me erëra të ftohta nga veriu e verilindja. Ndonjë ditë mund të kemi rritje të lehta të temperaturave, por prapë pritet të kemi vazhdimin e fluksit të ajrit të ftohtë nga verilindja dhe lindja. Ajri i ftohtë me reshje bore do të jetë i pranishëm vetëm në Turqi dhe shumë pjesë të Rusisë dhe larg në lindje të Evropes.
Pra, edhe ditëve të ardhshme do të kemi ardhjen e masave të ftohta ajrore nga lindja dhe verilindja, por të thata dhe kjo do të mundësojë dimër paksa të ftohtë, por pa borë. Ndryshim të gjendjes sinoptike mund të kemi javën e ardhshme për shkak të trysnisë së masave ajrore nga Mesdheu që megjithatë mund të depërtojnë duke u ndeshur me ajrin e ftohtë mund të kushtëzojnë reshje bore, por kjo mbetet vetëm një sinjal i cili nuk duhet të merret si parashikimi i sigurtë./MeteoBallkan
