Vazhdojnë paqartësitë dhe “konfuzioni” i madh i modeleve rreth pjesës së mbetur të Shkurtit, por këto ditë dihet se do të kemi një rritje të lehtë të temperaturave për shkak të rrymimeve ajrore nga jugu, jugperëndimi dhe juglindja si pasojë e afrimit dhe depërtimit të masave ajrore nga Mesdheu.
Këto masa ajrore do të kushtëzojnë edhe reshje të herëpashershme lokale, por pa ndonjë ndikim konkret. Në disa zona priten reshje paksa më intensive sidomos në disa vise të Shqipërisë, por asgjë e madhe. Borë vetëm shkurtimisht në ato zona ku ende mbetje të ajrit të ftohtë dhe në disa vise kodrinore-malore në sasi të pakta.
Gjendja po ndryshon pak në fundjavë me afrimin e një cikloni nga Italia, por mbetet ende paksa e paqartë ndikimi preciz i tij. Përderisa reshje bore priten në Slloveni, Kroaci dhe pjesë të Bosnjës e Hercegovinës, me ardhjen e sistemit në viset tona parashihet dobësimi i tij, prandaj reshjet te ne do të jenë më të pakta, por duke pas para sysh jo-stabilitetin e modeleve dhe se ndryshimet po ndodhin aq shpejtë ende mund të ketë gjasa për ndonjë ndryshim në parashikim. Edhe nëse mungon bora temperaturat polare me erëra të ftohta nuk do të mungojnë.
Gjithsesi temperatura polare depërtojnë prapë gjatë fundjavës dhe fillimit të javës së re dhe ne do jemi në periferi të këtyre masave të ftohta ajrore. Bërthama e ajrit të ftohtë pritet në veri dhe lindje të Evropes, prandaj ende nuk mund të thuhet me saktësi të lartë se a do të jetë fuqia e të ftohtit në viset tona. Reshje bore edhe nëse ka për fundjavë ato nuk do të zgjasin shumë.
Kjo është gjendja bazuar në ecuritë aktuale dhe presim prapë ndryshime të vogla. Për çdo ndryshim do të njoftoheni me kohë.
Deri në fundjavë pak më ngrohtë, me reshje të herëpashershme, lokale kryesisht shiu e në disa zona mund të ketë edhe borë. Gjatë fundjavës fillimisht relativisht ngrohtë, pastaj depërtim gradual i masave të reja, të ftohta ajrore me mundësi për reshje kalimtare bore./MeteoBallkan
