Vranësira lokale nga lindja dhe reshje krejtësisht të dobëta në disa rajone pritet të përfshijnë Kosovën sot dhe kjo është hyrje graduale në uljen e temperaturave që priten gjatë ditëve të ardhshme.
Sot në Kosovë pritet të mbajë mot me vranësira e mundësi për intervale kohore me diell. Në disa zona mund të ketë reshje krejtësisht të dobëta bore. Do të fillojnë të fryjnë erëra të ftohta nga lindja dhe juglindja.
Temperaturat pritet të luhaten nga -2 minimalja deri në 5 gradë Celsius ajo maksimale në Rrafshin e Kosovës, ndërsa në Dukagjin deri në 8 gradë Celsius.
Në Shqipëri pritet të mbajë mot kryesisht me diell, por në juglindje dhe lindje do të ketë më shumë vranësira me disa reshje të dobëta bore. Më shumë vranësira priten në Maqedoninë Veriore me reshje të dobëta lokale.
Vranësira priten edhe në Luginë të Preshevës, por në Mal të Zi pritet mot kryesisht i kthjellët. Temperaturat do të fillojnë të pësojnë ulje në tërë rajonin.
Të dielën më ftohtë dhe me vranësira e diell. Pritet fuqizim gradual i acarit Siberik. Reshje të dobëta bore priten vetëm në disa pjesë të Maqedonisë së Veriut dhe juglindje-lindje të Shqipërisë dhe ndoshta edhe në juglindje të Kosovës. Në përgjithësi acari do të jetë i thatë.
Edhe dita e hënë do të jetë mjaft e ftohtë, e thatë dhe me acar të fortë në mëngjes dhe mbrëmje./MeteoBallkan
