Një veprim që shumë njerëz e bëjnë çdo ditë në shtëpi mund të ndikojë në konsumin e energjisë elektrike.
Bëhet fjalë për mbajtjen e derës së frigoriferit hapur për një kohë të gjatë, një praktikë që mund ta detyrojë pajisjen të punojë më shumë për ta ruajtur temperaturën e duhur.
Për këtë kishte paralajmëruar edhe Kompania Kosovare për Distribuim të Energjisë Elektrike (KEDS), e cila kishte publikuar rekomandime për kursimin e energjisë, duke u bërë thirrje qytetarëve që ta mbajnë derën e frigoriferit dhe të ngrirësit të mbyllur sa më shumë që të jetë e mundur.
Kur dera hapet, ajri më i ngrohtë i ambientit hyn brenda dhe temperatura e brendshme e frigoriferit mund të rritet. Për ta rikthyer temperaturën e caktuar, sistemi i ftohjes duhet të largojë nxehtësinë shtesë, gjë që mund të zgjasë kohën e punës së kompresorit dhe të rrisë konsumin e energjisë.
Sa më gjatë të qëndrojë dera hapur, aq më shumë ajër i ngrohtë mund të hyjë brenda. E njëjta vlen edhe kur frigoriferi hapet shpesh brenda një periudhe të shkurtër.
Për të shmangur shpenzimet e panevojshme, rekomandohet që qytetarët të vendosin paraprakisht se çfarë u nevojitet nga frigoriferi, ta hapin derën vetëm për kohën e domosdoshme dhe ta mbyllin menjëherë pas marrjes së ushqimeve.
Gjithashtu, është e rëndësishme që dera të mbyllet mirë dhe guarnicionet të jenë në gjendje të mirë, në mënyrë që ajri i ftohtë të mos largohet vazhdimisht.
Edhe pse ky zakon nuk është faktori i vetëm që përcakton konsumin e frigoriferit, shmangia e hapjes së panevojshme mund të ndihmojë në përdorimin më efikas të energjisë elektrike në shtëpi
