Fronti i fuqishëm i ftohtë ajror i pasuar me ajrin e ftohtë polar do të depërtojë në Kosovë gjatë së Dieles duke kushtëzuar ulje të theksuara të temperaturave. Reshje fillimisht do të jenë në formë shiu, pastaj do të shndërrohen në shqote dhe shumë shpejt edhe në borë. Në shumë pjesë të Kosovës priten shtresa sidomos në viset kodrinore-malore, ndërsa në viset e ulëta shtresat do të jenë kryesisht simbolike, por mund të ndodhë në disa rajone që të ketë disa centimetra.
Erërat e ftohta dhe reshjet e borës do të na kujtojnë gjysmën e dimrit edhe pse jemi në muajin e Pranverës kur natyra ngjallet dhe lulëzon.
Reshje bore përpos Kosovës priten edhe në veri të Malit të Zi, verilindje, lindje dhe juglindje të Shqipërisë dhe shumë pjesë të Maqedonisë së Veriut ku priten shtresa bore. Reshje kalimtare bore priten edhe në Luginë të Preshevës.
Përderisa reshjet vazhdojnë në Maqedoni dhe juglindje të Shqipërisë në Kosovë ato pritet të ndërpriten në mbrëmje duke pasuar kthjellimet e pjesshme dhe acari, megjithatë erërat nuk do të ndalen tërësisht dhe kjo mund të pengojë dëmtimet e mëdha në kulturat e ndryshme apo pemëtari.
Fillimi i javës së re me alternime të shpeshta vranësirash e intervaleve kohore me diell dhe me reshje të dobëta lokale. Acari do të vazhdojë deri të Enjten në mëngjes dhe disa dëme janë të paevitueshme sepse në pyetje janë disa netë shumë të ftohta, por të shpresojmë që dëmet të jenë sa më të pakta. Detajet e vogla bëjnë dallimin mes dëmeve të mëdha dhe të vogla. Vranësirat dhe erërat gjatë natës dhe mëngjesit ndihmojnë shumë. Nëse nuk ka as vranësira dhe as erëra atëherë të gjitha pemët që kanë lulëzuar do të jenë në telashe të mëdha./MeteoBallkan
