Sot në Kosovë, Shqipëri, Maqedoni dhe Mal të Zi do të mbajë mot i thatë, me mëngjes të ftohtë dhe me ngritje graduale të temperaturave gjatë ditës. I tërë rajoni ynë do të jetë nën ndikimin e masave të fuqishme të thata anticiklonike me qendër në Evropën Perëndimore. Nëpër lugina ka mundësi që të ketë mjegull, kurse në disa rajone mund të ketë edhe vranësira të ulëta. Në shumë rajone do të ketë edhe intervale të gjata kohore me diell dhe ngritje të ndjeshme të temperaturave.
Pasnesër nuk pritet ndonjë ndryshim i motit, pra do të vazhdojë të mbajë mot i thatë dhe relativisht i nxehtë në tërë rajonin, për këtë periudhë kohore. Nga e Shtuna do të kemi përkeqësim gradual të motit si pasojë e depërtimit të ajrit të ftohtë nga veriu i Kontinentit. Nga e diela do të fillojnë edhe reshjet atmosferike në Kosovë ku pritet të kemi reshje lokale bore.
Gjatë natës në të dielën reshjet e borës do të përfshijnë shumicën e territorit të Republikës së Kosovës të cilat do të jenë me intesitet të ulët por edhe mesatar. Pritet edhe krijimi shtresave të borës vende-vende. Reshje të dobëta bore do të ketë edhe në Maqedoni dhe esktremet verilindore, lindore dhe juglindore të Shqipërisë, ditën e fundit të këtij viti. Herë pas here do të kemi edhe erëra mesatare, kurse në disa rajone edhe erëra të fuqishme veriore. Temperaturat do të shënojnë ulje, ndërsa edhe ndjesia subjektive e të ftohti do të jetë e fortë për shkak të erërave veriore. Ditën e fundit të këtij viti reshje të herëpashershme bore do të ketë edhe në Kosovë dhe nata e ndërrimit të motmoteve do të na gjejë nën petkun e bardhë në shumë vise të territorit të Kosovës me ndonjë përjashtim.
Pas një stabilizimi nëse mund të themi afatshkurtër në ditët e para të Janarit do të kemi depërtimin e masave të fuqishme të ftohta ajrore me origjinë polare, por për këtë fenomen informacione dhe detaje tjera do të japim në postimet tona të ardhshme sepse është shumë herët për ta ditur saktë./Meteoballkan.
