Ajsbergu gjigant A23a, i konsideruar prej dekadash si më i madhi në botë, po shpërbëhet me ritme të shpejta duke u kthyer në disa copa gjigante, kanë paralajmëruar shkencëtarët e British Antarctic Survey (BAS).
A23a, i cili dikur kishte një peshë prej afro një trilion tonësh dhe shtrihej në mbi 3,600 kilometra katrorë – pak më i madh se shteti amerikan Rhode Island – është ndjekur nga afër që prej vitit 1986, kur u shkëput nga Filchner-Ronne në Antarktidë.
Sot, sipas BAS, masa gjigante e akullit është tkurrur në rreth 1,700 kilometra katrorë.
Një udhëtim i pazakontë përmes oqeanit
Pas më shumë se 30 vitesh i “ngrirë” në fundin e Detit Weddell, A23a u lirua në vitin 2020 duke u bartur nga rrymat oqeanike. Në mars të këtij viti u bllokua përkohësisht në një raft kontinental, përpara se të lundronte sërish në maj. Që prej atëherë ka ndjekur rrymën e fuqishme të njohur si Southern Antarctic Circumpolar Current Front, që po e çon drejt ishullit South Georgia.
Ekspertët thonë se A23a po ndjek një “fat të ngjashëm” me ajsbergët e tjerë gjigantë A68 dhe A76, të cilët u shpërbënë pranë South Georgia në vitet e fundit.
Shpërbërja e A23a bën që titulli i ajsbergut më të madh aktualisht t’i kalojë D15a-s, me një sipërfaqe prej rreth 3,000 kilometra katrorë, i cili ndodhet ende i palëvizshëm. Ndërkohë, A23a ka zbritur në vendin e dytë dhe pritet të vazhdojë të fragmentohet në javët e ardhshme, deri në masa shumë të vogla për t’u ndjekur.
