Kjo verë ishte jashtëzakonisht interesante në aspektin meteorologjik veçanërisht për viset tona kontinentale. Bregdeti përjetojë një verë mjaft të nxehtë dhe kryesisht stabile me depërtime shumë të rralla të fronteve të ftohta, ndërsa krejt ndryshe ishte situata në viset tona kontinentale e veçanërisht në Kosovë ku frontet e Atlantikut depërtuan shumë shpesh duke kushtëzuar mot mjaft të paqëndrueshëm me rrebeshe të fuqishme lokale shiu me vetëtima, bubullimë dhe breshër.
Në Kosovë vera ishte më e ftohtë se mesatarja, por për fund kemi valën më të nxehtë të vapës afrikane për këtë verë dhe kjo në tri ditët e fundit të verës klimatologjike.
Sipas ecurive më të fundit sinoptike dy ditët e fundit të Gushtit pritet të jenë më të nxehtat për tërë stinën e verës në Kosovë. Freskimi i motit do të na vije me 1 Shtator dhe mund të shoqërohet me rrebeshe kalimtare shiu me vetëtima, bubullimë dhe mundësi edhe për breshër. Edhe bregdeti shqiptar mund të ketë rrebeshe lokale kalimtare shiu dhe freskim të motit, megjithatë ecuritë më të fundit sinoptike na bëjnë me dije se nga 2 Shtatori do të kemi përsëri rreze diellore dhe mot të këndshëm për plazh, duke mos përjashtuar edhe vranësirat kalimtare.
Përndryshe fqinjët tanë verior dhe veripeërndimot duke filluar nga Serbi, Mali i Zi e veçanërisht Bosnja dhe Hercegovina, Kroacia dhe Sllovenia ditëve të ardhshme do të goditen nga stuhi të fuqishme shiu me vetëtima, bubullimë dhe breshër si dhe reshje intensive shiu të cilat mund të qojnë në përmbytje, pra sezona e pushimeve mund të përfundojë për shumë ditë në Adriatikun verior për shkak të motit të ashpër dhe të freskët, por kjo nuk vlen për bregdetin shqiptar dhe Ulqinin ku ende do të kemi mot të këndshëm dhe të mirë për plazh, normalisht me mundësi edhe për ndonjë rrebesh afatshkurtër shiu./Meteoballkan