Fillimi i kësaj jave po karakterizohet me mot jashtëzakonisht të ftohtë, me reshje shiu dhe bore në viset kodrinore-malore, por temperaturat do të fillojnë të rriten gradualisht që nga dita e sotme.
Rritja graduale e temperaturave nuk do të thotë se motit do të stabilizohet plotësisht. Sot (e Martë) na pret mot kryesisht i vranët në tërë rajonin me riga dhe rrebeshe lokale shiu. Në viset malore ende me reshje bore herë pas here.
Të mërkurën pritet përmirësim i pjesshëm i motit. Priten edhe intervale kohore me diell, por edhe vranësira të cilat vende-vende mund të sjellin reshje afatshkurtra shiu. Rritje pak më të ndjeshme të temperaturave pritet të ndodhin ditën e enjte, kur do të kemi edhe intervale kohore me diell, megjithatë në fund të ditës ose gjatë ditës së premte një tjetër ciklon nga Mesdheu dhe front mjaft i fuqishëm i ftohtë nga veriu përfshin rajonin tonë.
Si pasojë të premtën përsëri ulje të ndjeshme të temperaturave dhe reshje shiu pothuajse në tërë rajonin. Në viset malore reshje shqote dhe bore. Nga e shtuna do të fillojë përmirësimi gradual i motit dhe reshjet e shiut do të fillojnë të tërhiqen nga rajoni dhe si pasojë dita e fundit e kësaj jave pritet të na sjell stabilizim të plotë të motit dhe ngritje të ndjeshme të temperaturave.
Sipas ecurive aktuale nga e diela mund të kemi disa ditë të ngrohta pranverore dhe të shpresojmë që kjo të mos ndryshojë. Nëse kemi ndonjë ndryshim do ju njoftojmë në postimet tona të përditshme./Meteoballkan