Sot Evropa përballet me një situatë të fuqishme atmosferike, me kushte të favorshme për zhvillimin e stuhive të forta në një pjesë të gjerë të kontinentit. Në qendër të vëmendjes është Italia veriore, ku ESTOFEX ka vendosur nivelin më të lartë të rrezikshmërisë, duke paralajmëruar për një episod potencialisht të rrezikshëm me superqeliza, breshër të madh, erëra të fuqishme, tornado dhe reshje intensive. Situata pritet të evoluojë gjatë ditës, ndërsa stuhitë mund të organizohen dhe të përhapen drejt zonave të tjera.
Dalja e sotme e ESTOFEX-it është dukshëm më serioze se një situatë e zakonshme me stuhi, sidomos për zonën e Nivelit 3.
ESTOFEX e ka vlefshmërinë nga e enjtja, 20 gusht, ora 06:00 UTC deri të premten, 21 gusht, ora 06:00 UTC. Parashikimi është publikuar mbrëmë nga forecaster-i Pucik.
🔴 Niveli 3 – Itali veriore
ESTOFEX ka vendosur Nivelin 3 mbi Italinë veriore për rrezik nga:
- breshër i madh deri shumë i madh
- erëra të fuqishme dhe dëmtuese
- tornado
- reshje shumë të dendura
- dhe përgjithësisht stuhi të organizuara me potencial të lartë dëmtues.
Ajo që e bën veçanërisht interesante këtë situatë është se ESTOFEX flet për një situatë potencialisht të nivelit të lartë, me mundësi për shumë superqeliza dhe segmente lineare të stuhive. Aktiviteti mund të zgjasë nga orët e vona të mëngjesit deri gjatë natës.
🌩️ Çfarë po favorizon këtë shpërthim stuhish?
Sipas analizës, në zonë kombinohen disa faktorë shumë të rëndësishëm: një brez i gjerë i erërave të forta jugperëndimore, një front i valëzuar dhe shumë lagështi në shtresat e ulëta të atmosferës.
Modelet parashikojnë rreth 1,500–3,000 J/kg CAPE dhe 15–25 m/s shear në 0–6 km rreth mesditës. Kjo është një kombinim shumë i favorshëm për stuhi të organizuara dhe superqeliza.
Madje gjatë mbrëmjes pritet që kushtet për organizim të stuhive të bëhen edhe më interesante, me rritje të shear-it në shtresat e ulëta. ESTOFEX përmend edhe SRH 0–1 km lokalisht mbi 150 m²/s², që është një faktor i rëndësishëm për rrezikun e tornadove nëse zhvillohen qeliza sipërfaqësore.
🌪️ Pjesa më interesante: superqeliza apo sistem i madh stuhish?
Kjo është pikërisht pasiguria kryesore e parashikimit.
ESTOFEX thotë se nëse stuhitë mbeten më të izoluara, rreziku rritet për:
breshër shumë të madh + tornado.
Nëse, përkundrazi, shumë qeliza bashkohen dhe zhvillohen në një sistem më të madh, rritet rreziku për:
erëra shumë të fuqishme + reshje ekstreme.
Pra, nuk është thjesht pyetja a do të ketë stuhi, por si do të organizohen ato.
🌧️ Edhe reshjet janë shqetësuese
ESTOFEX paralajmëron se rreziku nga reshjet e dendura nuk duhet nënvlerësuar. Në pjesë të zonës së Nivelit 3, veçanërisht në Liguri dhe pranë kufirit Zvicër–Itali, përmenden akumulime lokale deri në rreth 200 mm.
Ndërkohë, stuhitë pritet të lëvizin nga Italia drejt Adriatikut verior dhe Sllovenisë, me evoluim të mundshëm nga fundi i ditës drejt orëve të natës.
⚠️ Dhe nuk është vetëm Niveli 3
ESTOFEX ka vendosur gjithashtu një Level 2 në një brez shumë të gjerë nga Spanja deri në Poloninë jugore, kryesisht për breshër të madh/shumë të madh dhe erëra dëmtuese. Pra, bëhet fjalë për një situatë konvektive me përmasa shumë të mëdha në Evropë, ndërsa qendra e rrezikut maksimal është Italia veriore.
Në përgjithësi, kjo dalje e ESTOFEX-it mund të përshkruhet si një nga situatat më serioze konvektive të kësaj vere në Evropë, me një kombinim të pazakontë të lagështisë, energjisë dhe shear-it dhe me potencial për superqeliza, breshër ekstrem, tornado, erëra të dëmshme dhe reshje të jashtëzakonshme./MeteoBallkan
