Me masa ajrore anticiklonike nënkuptojmë mot më stabil dhe më të qetë, ndërsa në viset tona nga e Premtja do të fillojë depërtimi i masave të fuqishme ajrore anticiklonike që gradualisht do të kushtëzojnë stabilizim të atmosferës.
Stabilizimi i atmosferës do të jetë gradual por i sigurt. Menjëherë në fundjavë do të kemi më shumë diell, ndërsa temperaturat do të fillojnë të rriten ndjeshëm.
Vera klimatologjike do të fillojë me 1 Qershor dhe do të koincidojë me përmirësim substancial të motit dhe rritjen e ndjeshme të temperaturave.
Pra, temperaturat maksimale në ditën e parë të verës klimatologjike do të jenë verore edhe në Kosovës.
Pas “dislokimit” dhe stabilizimit të plotë anticiklonik në viset tona do të fillojnë të depërtojnë masa dukshëm më të ngrohta ajrore me origjinë nga Afrika veriore dhe këto masa të ngrohta ajrore do të fuqizohen edhe më shumë gjatë javës së re kur potencialisht mund të kemi valën e parë të nxehtësisë verore me temperatura maksimale deri në 30 apo edhe më shumë. Këto temperatura mbi 30 gradë Celsius mund të zgjasin më shumë se tri ditë, prandaj mund ta quajmë lirisht si “vala e parë e nxehtësisë tropikale”.
Pra, pas një kohë të gjatë me mot shumë të freskët vera e vërtetë po vjen shumë herët sivjet dhe ende është herët të flitet për kohëzgjatjes e saj, por sipas të gjitha gjasave kjo valë nxehtësie do të zgjasë të paktën 5 ditë e ndoshta një javë. Kjo mbetet të shihet dhe ne do ju mbajmë të informuar me evoluimin e situatës sinoptike./MeteoBallkan
