Gjatë natës fronti i fuqishëm i ftohtë ajror ka përfshirë Slloveninë dhe Kroacinë duke kushtëzuar rrebeshe dhe stuhi lokale me bubullima. Gjatë orëve të ardhshme fronti do të përshkallëzojë atmosferën në Ballkan duke e destabilizuar në format më të fuqishme, sidomos në Bosnjë dhe Hercegovinë, Serbi dhe Mal të Zi.
Këto tri shtete së bashku me Bullgarinë dhe Rumaninë do të përballën sot me stuhi mjaft të fuqishme shiu dhe breshëri ku ka gjasa që të ketë edhe struktura tornadike.
Fronti do të arrijë edhe në Kosovë, por paksa i dobësuar krahasuar me këto vende, por gjithsesi edhe në Kosovë priten zhvillime të fuqishme konvektive me erëra kalimthi të fuqishme dhe rrebeshe lokalisht të fuqishme shiu me vetëtima, bubullimë dhe mundësi për breshër. Pra, gjatë orëve të vona të pasdites ose në mbrëmje edhe në Kosovë ka gjasa për krijimin e ndonjë shtrëngate të fuqishme lokale.
Fronti do të sjellë rrebeshe me bubullima edhe në veri të Shqipërisë dhe lokalisht edhe në Maqedoninë e Veriut, por më së paku do të afektohen këto dy vende.
Para frontit do të fryjnë erëra të nxehta nga jugperëndimi, ndërsa pasdite vonë me ardhjen dhe fillimin e depërtimit të frontit do të fillojnë erëra nga veriperëndimi, veriu e pastaj verilindja që do të ulin temperaturat edhe në Kosovë.
Gjatë dites së nesërme na pret mot i këndshëm, me alternime mes vranësirave dhe intervaleve kohore me diell ku mund të ketë edhe ndonjë rigë ose rrebesh afatshkurtër shiu./MeteoBallkan
