Vitit 2025 filloi me një stabilitet të plotë atmosferik dhe si pasojë kemi edhe mjegull gjatë tërë ditës në disa lugina dhe ultësira. Kjo gjendje stabile atmosferike nuk do të zgjasë shumë sepse të Premten do të kemi ndryshim gradual të motit. Temperaturat rriten fillimisht me rrymime ajrore nga jugu ndërsa fronti i ftohtë ajror afrohet.
Me arritjen apo depërtimin e frontit të ftohtë do të ketë ulje të temperaturave dhe reshjet e shiu do të shndërrohen në borë në gati tërë Kosovën dhe disa pjesë të Shqipërisë e Maqedonisë së Veriut.
Ky front do të jetë paksa i fuqishëm, por kemi të bëjmë me një front tipik kalimtar, megjithatë mund të jetë i pasur me lagështi, prandaj pritet një interval reshjesh të dendura bore. Këto reshje do të krijojnë shtresa pas mesnatës së Premte dhe mëngjesin e hershëm dhe të vonshëm të ditës së Shtunë. Shtresa priten edhe në ultësirat e Kosovës, pastaj në verilindje të Shqipërisë, veriperëndim të Maqedonisë së Veriut dhe lokalisht në disa vise tjera, por asgjë serioze në tërësi. Kosova mund të përjetojë ndonjë ditë dimri sepse gjatë dhe pas borës do të ketë ulje të ndjeshme të temperaturave dhe një depërtim të ajrit mjaft të ftohtë polar pas-frontal.
Për këtë arsye mund të kemi një mëngjes (mëngjesi i së Dieles) me acar të fortë afërsisht deri në -8 apo -9 gradë Celsius.
E tëra do të jetë kalimtare sepse menjëherë në fillim të javës së re do të ketë ndryshim të menjëhershëm të rrymimeve ajrore, zbutje e menjëhershme e acarit dhe rritje e temperaturave, por të shtunën në mëngjes në shumë pjesë të Kosovës mund të kemi pamje spektakolare të reshjeve të borës. Mbetet të shihet./MeteoBallkan
