Në këto çaste kemi stuhi intensive në disa vise të Sllovenisë dhe Kroacisë, ndërkohë më herët stuhi të fuqishme breshëri me vetëtima dhe bubullima masive pati në Slloveni dhe tani ka reshje lokale bore sidomos në viset malore të Sllovenisë dhe Kroacisë.
Në viset tona ende është ngrohtë, ngase para frontit të ftohtë gjithnjë rriten temperaturat dhe kjo do të vërehet nesër gjatë ditës, ndërkohë që fronti afrohet, pasdite vonë ose në mbrëmje rrebeshe intensive do të përfshijnë Malin e Zi, veriun e Shqipërisë dhe Republikën e Kosovës.
Para ardhjes së frontit do të ketë erëra lokalisht të fuqishme nga jugperëndimi, ndërsa me ardhjen e frontit të ftohtë do të fryjnë erëra të fuqishme nga veriu e verilindja në Kosovë, veriperëndimi në Shqipëri.
Ndërkohë që në viset malore do të fillojnë reshje të dendura bore. Reshje bore do të ketë edhe në disa zona tjera më të ulëta mbidetare në Republikën e Kosovës. Fronti do të jetë i shpejtë dhe i furishëm dhe për këtë arsye priten erëra të fuqishme, breshër lokal, vetëtima dhe bubullimë dhe pastaj edhe shqotë dhe borë varësisht nga rajoni në rajon.
Pas përkeqësimit dramatik të motit në mbrëmje dhe reshjeve intensive, gjatë natës reshjet do të vazhdojnë herë pas here me intensitet të ndryshëm. Do të ketë reshje e rrebeshe shiu, shqote e bore. Reshjet më intensive priten në Kosovë, veri të Shqipërisë dhe Mal të Zi e në viset tjera reshje intensive priten vetëm lokalisht.
Do të jetë ky një front mjaft i fortë pas një kohë mjaft të gjatë me fronte të dobëta atmosferike, megjithatë përpos erërave të fuqishme që mund të jenë problematike në nuk pritet asgjë e jashtëzakonshme.
Sidoqoftë, e hëna sjellë mot mjaft të freskët e në disa vise edhe të ftohtë, me erëra veriore, ndërkohë që reshjet rrallohen e dobësohen, atmosfera do të stabilizohet gradualisht dhe përkohësisht.
Ngrica kryesisht të dobëta mund të ketë mëngjesin shumë të hershëm të së martës, megjithatë masa ajrore dhe vranësira të reja nga Mesdheu arrijnë duke rritur menjëherë temperaturat dhe duke minimizuar shanset për acar të qëndrueshëm.
Reshje të shpeshta lokale priten gjatë javës së re, por ngrica (përpos ndoshta mëngjesin e së Martës) nuk pritet të ketë dhe ky është lajm i mirë./MeteoBallkan
