Mbi fshatin zviceran Kandersteg rri pezull kërcënimi i një shembjeje të madhe shkëmbore e cila, në skenarin më të keq, mund të krahasohej me katastrofën që vitin e kaluar thuajse mbuloi plotësisht fshatin fqinj Blatten.
Ekspertët paralajmërojnë se shkrirja e permafrostit dhe e akullnajave si pasojë e ndryshimeve klimatike po destabilizon gjithnjë e më shumë shpatet malore në Alpe.
Rreth 1.300 banorët e Kanderstegut, një fshat në kantonin zviceran të Bernës, jetojnë në rrëzë të formacionit shkëmbor të pasigurt Spitze Stei, shkruan AP.
Një pjesë e malit lëviz dhe shembet prej vitesh, mirëpo rritja e temperaturave dhe shkrirja e akullit që mban të lidhur shkëmbinjtë po rrisin rrezikun e shembjeve edhe më të mëdha.
Fshati për momentin nuk është i rrezikuar drejtpërdrejt dhe banorët nuk janë evakuuar, por autoritetet kanë gati një plan evakuimi nëse situata përkeqësohet.
“Je i vetëdijshëm se kjo po ndodh, por nuk ke frikë”, tha banorja Brigitte Jüni. Ajo thotë se autoritetet kanë marrë të gjitha masat e mundshme.
“Nga këtu e tutje i mbetet natyrës. Është natyrë dhe kurrë nuk i dihet”, shtoi ajo.
