Jean-Marc Peillex është kryebashkiak në Saint-Gervais, fshati në rrëzen perëndimore të malit më të lartë në Evropë, maja e të cilit arrin në 4,807m.
Ai shton se ata që nuk ndjekin udhëzimet dhe marrin shtegun e rrezikshëm Goûter për t’i ngjitur drejt malit, janë duke luajtur “ruleta ruse” pasi shkëmbinjtë janë bërë më të rreshkitshëm.
Peillex shtonte se kosto mesatare e misioneve të kërkim-shpëtimit në mal është €10,000 ndërsa ato të funeralit në rreth €5,000, prandaj sipas tij nuk është e drejtë që këto të paguhen nga taksapaguesi francez.
Në deklaratën zyrtare shtohej se guidat malore tashmë nuk pranojnë më të shoqërojnë alpinistët në kalimin e rrezikshëm Goûter, nga Saint-Gervais drejt rezortit alpin të Chamonix.
Për këtë Peillex kritikonte ata që quante “pseudo-alpinistë” që insistonin të bënin ngjitjen, për të cilët thoshte se “mbajnë vdekjen në çantat e shpinës”.
Nuk është marrë ende vendimi për garancinë financiare por kryebashkiaku tha për rrjetin britanik BBC se do ta bëjë që alpinistët ‘të zgjohen’: “Nëse dikush mendon se është ilegale le të shkojë në gjyq”.
Ai shtonte më tej si shembull se një grup rumunësh ishin gjetur duke ngjitur malin muajin e kaluar të veshur me pantallona të shkurtra dhe atlete.
Sipas tij, një helikopter policie i kishte urdhëruar ata të ktheheshin prapa dhe ata ishin përgjigjur se do ta bënin ‘ditën e nesërme’.
Një guidë eksperte e Chamonix citohej nga rrjeti AFP se vetëm 20 alpinistë të aftë janë në gjendje të arrijnë majën në ditë, në krahasim me rreth 100 që e arrinin më parë.
Mont Blanc ka 11 maja mbi 4,000m lartësi në territorin francez dhe atë italian dhe tërheq mijëra turistë çdo vit.
Peillex tha se nuk kishte fuqi ligjore për të mbyllur kalimin sipas tij, të rrezikshëm, Goûter.
Ai shtonte se sivjet nuk ishte rritur numri i shpëtimeve dhe vdekjeve por vetëm numri i ngjitësve dhe sjelljet e tyre negative.
