Edhe kjo javë po kalon pa reshje atmosferike për shkak të masave të fuqishme ajrore të thata anticiklonike. Mëngjeset janë të ftohta dhe me mjegull, ndërsa ditët relativisht të ngrohta.
Gjendja sinoptike do të fillojë të ndryshojë krejt në fundjavë, gjegjësisht në fillimin e javës tjetër, kur nga Mesdheu perëndimore gjegjësisht Gadishulli Iberik përmes Mesdheut do të depërtojnë masa ajrore të ngrohta dhe lagshta në drejtim të Italisë. Në anën tjetër një masë e ftohtë ajrore me origjinë polare do të depërtojë direkt nga verilindja e Evropës në drejtim të Gadishullit Ballkanik dhe kjo është gjendje perfekte sinoptike për reshje shiu dhe bore në Gadishullin Ballkanik, pra kontakti mes ajrit të ngrohtë ciklonik nga Mesdheu ose perëndimi dhe ajrit të ftohtë polar nga veriu, verilindja ose lindja.
Sipas të gjitha gjasave të hënën pritet që në Kosovë të kemi reshje atmosferike shiu dhe pastaj edhe bore, por për detaje është shumë herët të flitet sepse e tëra do të varet nga pozita e ciklonit i cili pritet të përqendrohet në Detin Jon. Çdo ndryshim edhe më i vogël i pozitës së ciklonit mund të ndikojë në uljen ose rritjen e sasisë së të reshurave ose çdo ndryshim edhe më i vogël i temperaturave mund të përcaktojë se reshjet a do të jenë në formë shiu apo bore dhe për këtë arsye është shumë vështirë nga sot të jemi krejtësisht të saktë, por kemi indikacione të qarta se do të kemi reshjet e borës pak më serioze në Republikën e Kosovës dhe disa pjesë të Maqedonisë së Veriut dhe Shqipërisë krejt në fund të Nëntorit dhe fillim të Dhjetorit./Meteoballkan