Temperatura polare kanë përfshirë rajonin tonë këtë fillim të muaji të cilat u paraprinë nga fronti i ftohtë dhe reshjet e dëborës.
Java filloi mjaft e ftohtë, vende-vende me acar polar.
Gjatë kësaj jave do të jemi nën ndikimin e masave të ndryshme ajrore të cilat nuk sjellin ndonjë stabilitet të plotë atmosferik, por as reshje të mëdha. Në aspektin termik kemi përqendrimin e masave të ftohta polare të paktën edhe një ditë ose dy.
Reshjet atmosferike gjatë kësaj jave do të jenë të pakta dhe të karakterit lokal, ndërsa kulminacioni i të ftohtit polar sipas të gjitha gjasave do të jetë mëngjesi i hershëm i së Martes ku sipas disa modeleve në Kosovë nën kushte kthjellimi temperatura minimale mund të ulet deri në -5 apo -6 gradë Celsius, por siç kemi theksuar disa herë kjo mund të “zbutet” të themi kushtimisht nëse do të kemi vranësira gjatë natës, megjithatë sipas modeleve priten kthjellime por nganjëherë edhe vranësira. Kthjellimet sipas modeleve do të jenë mbizotëruese dhe kjo shton rrezikun për acar.
Acar pritet të ketë edhe mëngjesit e së Mërkurës, por paksa më i butë se mëngjesi i dites paraprake. Fatkeqësisht ende ka potencial për dëmtime. Temperaturat ditore do të fillojnë të rriten sidomos nga e mërkura, por mbetet ende ftohtë. Të Enjten pasdite pritet të kemi një front të ri të dobët, të ftohtë ajror me reshje të dobëta atmosferike shiu e ndoshta edhe ndonjë fjollë bore në disa rajone, ndërsa vazhdojnë erërat kryesisht nga veriu, por lokalisht edhe nga veriperëndimi dhe verilindja. Në Shqipëri moti do të përmirësohet shumë më shpejt gjatë javës sidomos në viset mesdhetare.
E Premtja dhe e Shtuna mbesim nën ndikimin e kushteve me vranësira dhe intervale të gjata kohore me diell, ndërsa vazhdojnë erërat ende paksa të ftohta nga veriu.
Afrika veriore fillon të “ngjallet”
Ndryshim i gjendjes sinoptike pritet të ndodhë të dielën kur masa ajrore të ngrohta me origjinë nga Afrika veriore do të filloi të depërtojë edhe në Kosovë me rritje të ndjeshme të temperaturave.
Pas disa ditëve të ftohta për shkak të “goditjes polare” në fundjavë kemi ardhjen përfundimtare të temperaturave pranverore, madje e diela edhe në Kosovës pritet të jetë ditë e ngrohtë, stabile, me shumë rreze dielli dhe temperatura deri në 20 gradë Celsius./MeteoBallkan
