Ky dimër po vazhdon të na “befasojë” për butësinë e tij dhe përderisa shumë vise të Kosovës (sidomos Dukagjini), Maqedonisë së Veriut dhe Shqipërisë gjatë kësij dimri nuk kanë përfituar reshje bore gati gjatë tërë dimrit, i njëjti avaz pritet edhe gjatë kësaj jave. Kjo vjen si pasojë e aktivizimit të madh të Oqeanit Atlantik dhe pak a shumë mund të lidhet edhe goditjet e fuqishme dimërore në lindje dhe verilindje të Shteteve të Bashkuara të Amerikes. Masat e fuqishme të ftohta ajrore nga atje (Amerika) me depërtimin e tyre në Oqeanin Atlantik kanë krijuar ciklone të fuqishme përgjatë Atlantikut verior, Britanisë së Madhe e deri në Skandinavi dhe në anën tjetër kemi fuqizimin e madh të anticiklonit të Azoreve i cili është fajtori kryesor për mungesën e dimrit në rajonin tonë.
Gjatë kësaj jave na pret mot pothujase sikur në pranverën e hershme. Temperaturat pritet të jenë mbi vlera mesatare. Priten intervale kohore me diell dhe vranësira të shpeshta të cilat herë pas here mund të na sjellin edhe riga shiu, por në përgjithësi nuk priten reshje të mëdha dhe as të mjaftueshme.
Të mërkurën pritet krijimi i një cikloni në Itali i cili do të na sjellë reshje shiu. Në Shqipëri mund të ketë reshje të dendura shiu, ndërsa në Kosovë më pak.
Nga e enjta do të pasojë rritja e temperaturave dhe fuqizimi i erërave jugperëndimore. Këto rritje të temperaturave herë pas here mund të ndërprehehen shkurtimisht nga fronte kryesisht të dobëta nga veriu dhe verilindja, por të cilat nuk pritet të ndikojnë shumë në ulje të temperaturave. Për fundjavë na pret mot edhe më i ngrohtë, me temperatura maksimale mbi 15gradë Celsius.
Pra vazhdon mot pranveror, me intervale kohore me diell dhe reshje të rralla shiu si dhe pa gjasa për ndonjë goritje serioze dimërore./MeteoBallkan