Korriku në Kosovë do të fillojë me mot të ngrohtë dhe me intervale të gjata kohore me diell, por edhe shtim lokal të vranësirave. Nga mesdita ose pasdite parashihen zhvillime të vranësirave konvektive që do të kushtëzojnë rrebeshe lokale shiu me vetëtima dhe bubullimë. Lokalisht mund të ketë rrebeshe intensive, shkarkesa të fuqishme elektrike dhe breshër, por reshjet nuk do të kapin tërë territorin, madje shumë rajone nuk do të kapen nga rrebeshet e shiut.
Në Shqipëri nesër pritet të mbajë mot i paqëndrueshëm e me rrebeshe lokale shiu me vetëtima dhe bubullimë sidomos në veri dhe veriperëndim të vendit. Pasdite rrebeshet do të shtrihen lokalisht edhe në pjesët qendrore dhe lindore, ndërsa gjatë natës priten rrebeshe lokalisht intensive që nga veriu do të shkojnë drejt jugut sidomos në zonat bregdetare. Rrebeshe shiu nesër priten edhe në Mal të Zi, ndërsa rrebeshe të izoluara priten në Maqedoninë Veriore dhe Luginën e Preshevës.
Të dielën nga bregdeti stabilizim dhe përmirësim gradual i motit. Në viset kontinentale të rajonit duke përfshirë edhe Kosovën priten intervale kohore me diell dhe rrebeshe të lokalizuara shiu me ndonjë vetëtimë dhe bubullimë. Nga mbrëmja stabilizim i motit në tërë rajonin.
Të hënën dhe të martën na pret mot i ngrohtë dhe kryesisht me diell. Të martën pasdite mund të ketë zhvillime të rrebesheve të izoluara në disa rajone./METEOBALLKAN
