Nesër në Kosovë do të mbajë mot mjaft i paqëndrueshëm, me intervale kohore me diell dhe shtim të vranësirave të cilat do të kushtëzojnë reshje lokale shiu. Reshje më intensive shiu priten në veriperëndim, veri dhe perëndim të vendit, e më të pakta në lindje dhe juglindje. Erërat jugore përsëri do të intensifikohen apo fuqizohen herë pas here. Në malet e larta reshje bore.
Në Shqipëri nesër pritet të mbajë mot i vranët dhe me reshje shiu. Vende-vende, herë pas here priten reshje intensive shiu dhe erëra të fuqishme si dhe rrebeshe intensive shiu me vetëtima dhe bubullimë. Mot i ngjashëm pritet edhe në Mal të Zi, ndërsa në Maqedoninë Veriore shumë më pak reshje.
Ditën e fundit të vitit 2020 pritet të mbajë mot kryesisht i vranët, paradite me reshje shiu në tërë rajonin dhe bore në viset malore. Pasdite reshje do të pushojnë në Kosovë dhe gjatë natës moti do të qetësohet. Në Shqipëri priten riga të lokalizuara shiu natën e ndërrimit të motmoteve.
Viti 2021 do të fillojë me mot pak më të qetë dhe pa reshje. Temperaturat do të pësojnë ulje të lehta, por menjëherë do të fillojnë të ngritën. Nga 3 Janari përsëri fuqizim gradual i erërave jugore dhe reshje të reja lokale shiu./Meteoballkan
