Vranësirat të cilat po i shohim po vijnë nga cikloni i stacionuar thellë në Mesdhe. Këto vranësira nuk sjellin reshje atmosferike, por kjo është shenjë e dobësimit të bllokadës anticiklonike. Në anën tjetër nga veriu dhe verilindja e Evropës po afrohet një front i ftohtë ajror i pasur me ajër të ftohtë polar, por jo shumë i pasur me reshje atmosferike. Kjo masë ajrore e ftohtë polare do të arrijë nesër vonë dhe të hënën duke shkaktuar ulje të ndjeshme të temperaturave. Në Kosovë nesër në mbrëmje vonë priten edhe reshje sporadike shiu të cilat shumë shpejt do të shndërrohen në reshje bore, por reshjet nuk do të jenë gjithëpërfshirëse dhe po ashtu edhe aty ku do të bien do të jenë afatshkurtra.
Pra, goditja e dytë polare do të jetë pak më e fuqishme se e para, por në përgjithësi do të jetë kryesisht e thatë dhe pa ato “zbavitjet” dimërore të cilat të gjithë po i presim me padurim.
Për fillimin e javës së re do të na nevojitet gardëroba e trashë sespe gjatë ditës do të kemi erëra të ftohta veriore, ndërsa temperaturat natën mes së hënës dhe së martës në Kosovë do të sillën nga -6 deri në – 8 gradë Celsius.
Po ashtu, kjo valë e të ftohtit polar nuk do të zgjasë shumë për shkak se nga mesjava do të fillojnë të depërtojnë masa të ngrohta ajrore nga Mesdheu si pasojë e cikloneve të fuqishme nga Britania e Madhe deri në Itali. Këto masa ajrore do të na sjellin edhe reshje të shpeshta shiu, ndërsa në viset malore reshje bore./Meteoballkan