Gjatë ditës së djeshme temperaturat në tërë rajonin tonë ishin mjaft të larta dhe në këto raste mjafton një depërtim i një sasie të ajrit të ftohtë dhe të lagësht (të paqëndrueshëm) për të shkaktuar “eksplozione atmosferike”. Pikërisht kjo ndodhi dje në Kosovë. Nga veriperëndimi depërtoi një masë ajrore e ftohtë dhe e lagësht e cila në kontakt me ajrin shumë të nxehtë shkaktoi konveksione të fuqishme vranësirash apo thënë ndryshe zhvillime të fuqishme të vranësirave vertikale të cilat shkaktuan stuhi të fuqishme në disa pjesë të Kosovës sidomos në qendër të vendit, pastaj edhe në veriperëndim dhe juglindje si dhe disa vise në Maqedoninë Veriore. Këto vranësira u zhvilluan aq shumë vertikalisht sa që depërtuan në shtresa të larta atmosferike ku temperatura ishte e akullt dhe për këtë arsye kishim breshër masiv.
Zhvillime lokale pati edhe gjatë orëve të hershme të mëngjesin ku pati rrebeshe lokalisht të fuqishme shiu me vetëtima dhe bubullimë. Gjatë orëve të ardhshme përsëri mund të ketë ndonjë zhvillim aty-këtu me ndonjë rrebesh shiu, ndërsa pasdite vonë dhe në mbrëmje pritet stabilizim i plotë i atmosferës.
Nesër (e diele) na pret mot kryesisht stabil, me diell dhe i nxehtë me ngritje të lehta të temperaturave edhe në ato rajone ku pati freskim të motit. Të hënën dhe të martën na pret mot shumë i nxehtë dhe me zagushi, kurse nga e marta vonë ose e mërkura pritet destabilizim dhe përkeqësim i fuqishëm i motit me rrebeshe të fuqishme shiu me vetëtima dhe bubullimë për arsye të depërtimit të një “turbullire” nga Atlantiku. Sipas parashikimeve aktuale (shpresojmë të mos ketë ndryshim) këto reshje mund të jenë mjaft intensive dhe do të përfshijnë edhe Shqipërinë dhe rajonin e Dukagjinit ku ka thatësi të madhe. Gjithashtu priten ulje të ndjeshme të temperaturave./Meteoballkan
