Çmimi i vajit të kokosit, një përbërës kyç në akullore, është rritur në vitin 2025.
Në fund të majit, çmimi me shumicë i vajit të kokosit filipinez të dorëzuar në Roterdam, standardi i industrisë, arriti në 2,800 dollarë për ton, rreth dyfishi i çmimit të një viti më parë.
Kushtet e pafavorshme të motit në Indonezi dhe Filipine , të cilat së bashku përbëjnë tre të katërtat e furnizimeve globale të vajit të kokosit, kanë ndikuar negativisht në prodhim. Çmimet e akullores janë rritur.
Sipas një analize nga RIFT, një firmë konsulence britanike për biznesin, çmimet e shkopinjve dhe koneve të akullores në supermarketet e Mbretërisë së Bashkuar u rritën me 7.6 përqind në maj.
Për shkak të pikës së lartë të shkrirjes, vaji i kokosit e mban akulloren e prodhuar industrialisht të ngurtë për më gjatë në temperaturë ambienti. Çelësi për kompanitë ushqimore është se kjo mund të arrihet pa ndikuar në shijen dhe strukturën e akullores.
Industria globale e akullores, me një vlerë prej 81 miliardë dollarësh në vitin 2024, tani po monitoron nga afër dinamikën e tregut që ndikon në çmimet e kokosit.
Çfarë roli luajti moti?
Kokosi gjendet në zonat tropikale, ku shumë shi dhe diell kanë një efekt pozitiv në rritjen e tij. Por fenomeni global atmosferë-oqean El Niño, i cili e bën sipërfaqen e Oqeanit Paqësor më të ngrohtë, ka çuar në mot të thatë në të gjithë Azinë Juglindore, veçanërisht nga qershori deri në tetor të vitit të kaluar.
Gjatë kësaj periudhe, fermat e kokosit u goditën nga nxehtësia ekstreme dhe thatësira. Meqenëse kokosit i duhet një vit për t’u rritur, modeli i motit i vitit të kaluar bëri që palmat të prodhonin më pak fruta se zakonisht në vitin 2025, duke ulur furnizimin.
Departamenti i Bujqësisë i Shteteve të Bashkuara pret që kushtet e pafavorshme të motit do të shkaktojnë rënie të prodhimit global të vajit të kokosit në 3.6 milionë ton në vitet 2024 dhe 2025, një rënie prej 5 deri në 10 për qind nga sezoni i kaluar.
Sipas analistëve, prodhimi ka të ngjarë të mbetet i ulët në sezonin 2025/2026.
