Edhe sot dhe nesër territoret tona do të jenë nën ndikimin e masave mjaft të nxehta ajrore të cilat kulmojnë ditën e premte me nxehtësi solide verore. Në anën tjetër cikloni i fuqishëm afër Britanisë së Madhe dhe Skandinavi do të fillojë të ushtrojë trysni në Alpe dhe Italinë veriore duke mundësuar krijimin e një cikloni të fuqishëm sekondar pikërisht në veri të Italisë. Së bashku me ciklonin vjen edhe fronti masiv ajror i ngrohtë dhe i ftohtë në kuadër të të cilëve do të ketë sisteme frontale të stuhishme me vranësira të dendura, rrebeshe intensive shiu me vetëtima, bubullimë dhe breshër.
Këto masa mjaft jo-stabile ajrore sot do të fillojnë të destabilizojnë motin në Slloveni, pastaj deri të shtunën pasdite do të arrijnë edhe në Shqipëri dhe Kosovë.
Përpara ardhjes së fronteve do të rritet temperatura edhe më tutje duke kulmuar të premten dhe të shtunën paradite në disa vise në Maqedoninë Veriore dhe lindje të Kosovës.
E shtuna sjellë destabilizim të fuqishëm të atmosferës pasdite me rrebeshe lokale shiu me vetëtima dhe bubullimë. Fillimisht priten instabilitete parafrontale (rrebeshe lokale shiu me vetëtima, bubullimë dhe breshër), ndërsa më vonë sistemi frontal nga Shqipëria dhe Mali i Zi sjellin vranësira të dendura dhe shtrëngata me bubullima. Sipas ecurive aktuale sinoptike në Kosovë e shtuna pasdite ose në mbrëmje pritet të jetë jashtëzakonisht jo-stabile. Pas shirave dhe furtunave lokale pason ulja e temperaturave.
Nga e diela na pret mot më i freskët, me intervale kohore me diell e vranësira e ndonjë rrebesh lokal shiu. Temperaturat pritet të jenë të freskëta edhe në fillim të javës së re, ndërkohë që vazhdojnë reshjet lokale, të herëpashershme./METEOBALLKAN