Reshjet e shiut kanë filluar por ne ende mbetemi nën ndikimin e masave të ngrohta ajrore nga Mesdheu.
Në anën tjetër fronti i ftohtë ka arritur deri në Detin Adriatik dhe Bosnjë dhe Hercegovinë duke formuar edhe ciklonin sekondar. Ky ciklon do të sjellë sonte reshje të dendura atmosferike sidomos në Bosnjë dhe Hercegovinë ku priten rrebeshe intensive shiu dhe stuhi të fuqishme shiu dhe bore. Priten edhe dëme materiale. Në tërë territorin e Bosnjës dhe Malit të Zi priten reshje intensive bore, përveç bregdetit malazez dhe Hercegovine ku priten rrebeshe intensive shiu.
Gjatë ditës së nesërme cikloni do të vazhdojë rrugën në drejtim të jugut të Italisë, njëkohësisht fronti i ftohtë në kuadër të ciklonit do të arrijë deri në Kosovë duke kushtëzuar edhe tek ne reshje të dendura shiu, ndërsa me uljen e temperaturave vende-vende do të kemi edhe reshje të dendura bore, varësisht se cila masë ajrore do të “triumfojë” ( e nxehta nga Mesdheu apo e ftohta nga veriperëndimi) do të determinojë në masë të madhe llojin e reshjeve atmosferike. Në viset kodrinore-malore priten reshje intensive bore.
Sidoqoftë, territori i Kosovës do të jetë “fushëbetejë” e vërtete mes ajrit të ftohtë dhe të nxehtë dhe për këtë arsye na pret mot mjaft dinamik dhe i pasur me reshje atmosferike nga të gjitha llojet./Meteoballkan