Temperaturat polare më në fund kanë pushtuar rajonin tonë duke kushtëzuar ulje të theksuara të temperaturave që në shumë pjesë të Kosovës dhe Maqedonisë tani temperatura shënon -5 gradë Celsius, ndërsa ndjesia është deri në -10.
Masat e ftohta ajrore tanimë janë stacionuar dhe do të mbesin në rajonin tonë për disa ditë me radhë, madje duke u fuqizuar edhe më tutje. Për shkak të ndikimit të anticiklonit shumë të fuqishëm evropian reshjet e borës janë të pakta dhe lokale.
Ndjesia subjektive e të ftohtit ka arritur deri në -23 siç mund të shihet në foto dhe kjo ka ndodhur në jugperëndim të fqinjit tonë verior, Serbisë.
Temperaturat reale janë rreth -5 gradë Celsius, diku pak më të ulëta e diku pak më të larta, ndërsa ato minimale pritet të ulen edhe më shumë gjatë dy-tri netëve të ardhshme. Në aspektin subjektiv kjo mund të quhet si dimër mjaft monoton për shkak të acarit të thatë./MeteoBallkan