Vala e të nxehtit ekstrem, e cila ka përfshirë pjesë të Evropës Perëndimore dhe Qendrore, pritet të shtrihet gradualisht edhe në Kosovë dhe rajon gjatë ditëve në vijim.
Sipas parashikimeve, temperaturat maksimale në Kosovë pritet të arrijnë deri në 37 gradë Celsius të hënën në Rrafshin e Kosovës, ndërsa në Rrafshin e Dukagjinit deri në 39 gradë Celsius. Në disa zona, temperaturat mund të arrijnë edhe 40 gradë Celsius.
Sipas meteorologut Mendim Rugova, këto vlera mund t’i afrohen ose ta tejkalojnë rekordin e muajit qershor, të regjistruar më 26 qershor 1982 në Prizren, kur temperatura arriti në 40.6 gradë Celsius.
Temperaturat më të larta absolute të regjistruara në Kosovë u shënuan në korrik të vitit të kaluar, me vlera prej 42 dhe 43 gradë Celsius.
Edhe rajoni pritet të përballet me temperatura shumë të larta. Në pjesë të Malit të Zi, veçanërisht në Podgoricë, si dhe në disa zona të Shqipërisë, temperaturat maksimale pritet të arrijnë deri në 42 gradë Celsius, ndërsa në disa lokalitete mund të shënohen edhe deri në 43 gradë Celsius.
