Alpinisti nepalez Nirmal Purja, i cili vendosi rekordin për ngjitjen më të shpejtë të 14 maleve më të larta në botë, ka vdekur në një ortek gjatë një ekspedite në Pakistan së bashku me nëntë të tjerë që ishin me të, tha kompania e tij.
“Me trishtim të thellë dhe zemër të thyer konfirmojmë sot se Nirmal ‘Nimsdai’ Purja ka humbur jetën tragjikisht pas një orteku në (Malin) Broad Peak”, tha kompania e tij e ekspeditës Elite Exped në një postim në Instagram.
“Gjithashtu kemi marrë konfirmim se anëtarët e tjerë të ekspeditës për fat të keq nuk mbijetuan”, shtoi kompania, pa dhënë detaje të mëtejshme.
Dyzet e tre vjeçari Purja dhe nëntë të tjerë janë zhdukur që nga e enjtja, pasi u kapën nga një ortek në Broad Peak me lartësi 8,051 metra, mali i 12-të më i lartë në botë dhe një nga ngjitjet më sfiduese në provincën Gilgit-Baltistan të Pakistanit.
Purja, i cili shërbeu në forcat speciale britanike si Gurkha, vendosi rekordin për ngjitjen më të shpejtë në gjashtë muaj në vitin 2019. Ai u bë i famshëm në botë pasi Netflix realizoi një dokumentar për udhëtimin e tij, “14 Maja: Asgjë nuk është e pamundur”, dy vjet më vonë.
Orteku zuri 10 alpinistë rreth mesditës së së enjtes. Gjashtë ishin nepalezë, ndërsa pjesa tjetër ishin nga Pakistani, Omani, Shtetet e Bashkuara dhe Kina.
