Nesër në territorin e Republikës së Kosovë pritet të fillojnë reshjet e shiut të cilat në disa intervale mund të jenë mjaft të dendura dhe mund të shkaktojnë edhe vërshime të shpejta në disa zona.
“Fajtor” për këtë gjendje do të jetë masa e fuqishme ajrore ciklonike me shumë lagështi që vjen nga Atlantiku, një ciklon i përmasave të mëdha që do të shtrihet në tërë Ballkanin, ndërsa qendra e tij do të zhvendoset në Ukrainë duke u intensifikuar. Gjatë kësaj kohe në Kosovë pritet reshje të dendura shiu, ndërkohë që reshje të dendura bore do të fillojnë në viset e larta malore duke ulur lartësinë mbidetare gradualisht. Në orët e mbrëmjes reshje shqote e bore mund të bien edhe në disa zona më të ulëta në Kosovë, pra mund të kemi reshje të dendura të përziera ose edhe bore, por jo në shumë ultësira.
Të premten temperaturat do të shënojnë ulje dhe ajri i ftohtë depërton nga veriu, por reshjet ulin intensitetin. Shiu do të shndërrohet në borë gradualisht në shumë vise të Kosovës dhe në disa intervale mund të ketë reshje të dendura bore, por pa ndonjë akumulim në zonat më të ulëta të vendit. Kjo ndodhë ngase me uljen e temperaturave reshjet do të ulin intensitetin sepse reshjet kryesore do të ikin në formë shiu, megjithatë do të kemi disa pamje sa për tu kënaqur sadopak. Në zonat malore mund të kemi dimër të vërtetë.
Reshje shiu e bore nesër pritet të kemi edhe në Shqipëri, Maqedoninë Veriore, Luginë të Preshevës dhe Mal të Zi, lokalisht intensive, ndërsa reshje bore vetëm në zonat malore. Të premten reshje bore priten edhe në zona kodrinore dhe disa zona të ulëta në Maqedoninë e Veriut.
Pra, përgadituni për një ndryshim drastik të motit, me reshje intensive shiu e pastaj edhe me ulje të temperaturave e reshje të herëpashershme lokale bore. Në zonat malore priten reshje të dendura bore. Në zonat e ulëta të Kosovë dhe Maqedonisë do të ketë borë, por jo aq shumë dhe do të kemi dy ose tri ditë mot dimëror, sidoqoftë jo ai dimri i vërtetë nëpër ultësira.
Pas kalimit të kësaj mase të ftohtë polare do të pasojë stabilizimi i motit dhe ardhja e anticiklonit të fuqishëm të Azoreve. Ky anticiklon do të mundësojë edhe rritjen e temperaturave ditore dhe për një kohë do të largojë masat e lagështa ajrore nga rajoni ynë, prandaj mund të kemi një periudhë me mot monoton dhe me mjegull, por kjo mbetet të shihet, edhe pse ecuritë më të fundit sinoptike janë zhgënjyese për festat e fundvitit. Shpresojmë ndonjë ndryshim./MeteoBallkan
