Territoret tona po vazhdojnë të jenë nën ndikimin e masave mjaft të ngrohta ajrore me origjinë nga Atlantiku, Mesdheu dhe Afrika veriore, ndërkohë që dimri i ashpër është koncentruar në Skandinavi dhe Rusi.
Edhe pse jemi në fillim të Janarit temperaturat vazhdojnë të rriten në viset tona dhe do të rriten edhe më shumë sidomos të shtunën kur mund të kemi temperatura deri në 15 gradë Celsius në Kosovë dhe normalisht edhe më ngrohtë në Shqipëri. Megjithatë moti gjatë ditëve të ardhshme nuk do të jetë stabil dhe lokalisht priten reshje e rrebeshe shiu duke mos përjashtuar ndonjë stuhi të izoluar me vetëtima dhe bubullimë.
Dimri rikthehet në Evropë
Fundi i Nëntorit dhe Dhjetori shënuan goditje dimërore në Evropë e sidomos në Gjermani dhe Austri, por edhe në shumë vende tjera. Situata sinoptike favorizon rikthimin e dimrit ose ajrit mjaft të ftohtë polar dhe reshjeve të borës sidomos në jug të Gjermanisë, juglindje të Francës, veri të Italisë, pjesën më të madhe të Austrisë, Çekisë, Sllovakisë etj.
Krejt në funnd të kësaj jave dimri fillon të depërtojë edhe në Ballkan, fillimisht në Slloveni, pastaj në Kroaci, Bosnjë dhe Hercegovinë, Serbi, Mal të Zi, Kosovë, Shqipëri, Maqedoni Veriore, Greqi dhe Turqi.
Kjo goditje dimërore do të jetë solide por krejtësisht normale ngase jemi në fillim të Janarit. Parashihen edhe reshje bore, por në territoret tona nuk duhet të presim reshje të mëdha bore, përpos disa zonave kodrinore-malore. Reshje bore priten edhe në viset më të ulëta, por ato do të jenë të pakta dhe të karakterit lokal, megjithatë sasia e reshjeve të borës mund të ndryshojë ende.
Pra, ajri i ftohtë polar i përqëndruar në Skandinavi dhe Rusi më në fund po shpërndahet gradualisht në drejtim të pjesëve tjera të Evropes dhe Ballkanit, por jo me ashpërsi të madhe sikur në veri të Evropes.
Nga nesër do të mundohemi të jemi më aktiv për të përcjellur sa më mirë gjendjen sinoptike./MeteoBallkan
