Në Austri, e cila është prekur nga reshjet e dendura që solli cikloni Boris në Evropën Qendrore dhe Lindore, situata më e rëndë me përmbytjet është në provincën e Austrisë së Poshtme, e cila u shpall zonë fatkeqësie të dielën.
Për shkak të reshjeve të dendura, trafiku në Vjenë është pezulluar pjesërisht sot, shkollat janë në gjendje emergjente, shumë rrugë janë mbyllur dhe disa ndërtesa mund të arrihet vetëm me barkë, raportojnë mediat austriake.
Gazeta Heute raporton se transporti publik është në ndalesë dhe metroja është pjesërisht e mbyllur për shkak të mosfunksionimeve si pasojë të përmbytjeve të shkaktuara nga shirat e dendur.
Kurir vjenez bën të ditur se disa ndërtesa në kryeqytetin austriak mund të arrihet vetëm me barkë.
Deri më tani, gjashtë persona janë lënduar nga stuhia në Vjenë, njoftuan autoritetet e qytetit në një konferencë për shtyp të dielën pasdite.
Qindra njerëz u shpëtuan gjatë fundjavës në Austrinë e Poshtme, e cila u godit rëndë nga përmbytjet dhe u shpall zonë fatkeqësie.
Sasi të pabesueshme shiu, në disa vende edhe katër herë më të larta se vlerat mesatare të muajit shtator, kanë sjellë një situatë jashtëzakonisht të vështirë në Austrinë lindore.
Edhe pse nata e së dielës dhe të hënës ishte e qetë në Austrinë e Poshtme, meteorologët kanë parashikuar reshje të dendura shiu për ditën e sotme, duke thënë se do të bien deri në 60 litra shi për metër katror.
Cikloni Boris solli reshje të mëdha shiu në Evropën Qendrore dhe Lindore dhe sipas të dhënave të djeshme, të paktën shtatë persona kanë humbur jetën nga përmbytjet.
Niveli i ujit të lumenjve në Evropën Qendrore vazhdon të rritet, përfshirë Danubin.
Kryetari i bashkisë së Budapestit, Gergelj Karacsonyi, tha të dielën se Budapesti kërcënohet nga përmbytjet më të mëdha në dekadën e fundit. /MeteoBallkan
