Një kohë tani mjaft të gjatë kemi “pushtetin absolut” të masave ajrore të thata anticiklonike në Kosovë, Shqipëri dhe rajon, ndërsa reshjet ishin krejtësisht të pakta dhe të papërfillshme.
Trendi i bllokadës anticiklonike e cila bllokon masat e lagështa ajrore të vijnë te ne do të vazhdojë edhe gjatë ditëve të kësaj jave, por krejt në fundjavë mund të kemi një depërtim të një fronti të ftohtë ajror i cili vjen nga verilindja dhe mund të kushtëzojë edhe reshje lokale shiu e bore në viset kodrinore-malore. Reshjet ende parashihen të dobëta dhe të izoluara, pra nuk priten reshje në të gjitha viset, por kjo do të varet nga fuqia dhe pozicioni i saktë i frontit të ftohtë ajror nga verilindja.
Pra, deri në fundjavë vazhdon mot pothuajse “Copy-Paste” me ditët e kaluara, stabil dhe me mjegull e ngrica kryesisht të dobëta në mëngjes. Ditë të ngrohta vjeshtore. Temperaturat nga -2 deri në 17 gradë Celsius në Kosovë. Në fundjavë më ftohtë sidomos të dielën me mundësi edhe për reshje lokale shiu e bore. Reshjet do të jenë të pakta dhe të izoluara.
Më ngrohtë në Shqipëri, me temperatura deri në 25 gradë Celsius në zonat më të ngrohta mesdhetare. Të dielën mund të kemi frontin e ftohtë ajror që mund të kushtëzojë edhe reshje lokale bore në juglindje të Shqipërisë dhe perëndim të Maqedonisë së Veriut. Bora do të përqendrohet normalisht në viset kodrinore-malore. Reshjet do të jenë të pakta dhe kjo do të varet nga fuqia e frontit të ftohtë dhe krijimi i ndonjë ciklogjeneze eventuale në Adriatik po në Detin Jon. Kjo ende është e paqartë, por ka disa sinjale që mund të kemi disa fjolla bore.
Ishte ky parashikimi i motit për këtë javë me pak fjalë. Ndryshime mund të ketë sidomos për ditën e fundit të javës. Për çdo ndryshim eventual do të njoftoheni në postimet tona të përditshme./MeteoBallkan
