Siç po shihet edhe në imazhin e fundit satelitor mbi rajonin tonë kanë vërshuar vranësirat, por ka edhe intervale kohore me diell. Vende-vende ka edhe rrebeshe të fuqishme shiu me vetëtima dhe bubullimë. Kjo vije si pasojë e depërtimit të masave ajrore jo stabile me origjinë nga Atlantiku. Pozita e masave ajrore ciklonike favorizon ende temperaturat e larta dhe erërat kryesisht nga jugu, por normalisht moti është më i freskët për shkak të vranësirave, erërave dhe reshjeve atmosferike. Kjo gjendje sinoptike do të vazhdojë edhe disa ditë, pra ende do të jemi nën ndikimin e masave të nxehta ajrore për shkak të rrymimeve ajrore nga jugu. Të dielën do të kemi ulje të ndjeshme të temperaturave për shkak të depërtimit të frontit të ftohtë dhe masave të ftohta ajrore nga veriperëndimi.
Reshjet atmosferike do të vazhdojnë edhe sonte dhe nesër, por do të jenë të karakterit lokal, pra jo gjithëpërfshirëse dhe do të vazhdojnë në formë të rrebeshe afatshkurtra, por në disa vise të Shqipërisë (veriperëndim p.sh) priten reshje më intensive dhe me kohëzgjatje më të lartë. Të enjtën dhe të premtën shkurtimisht pritet stabilizim i motit, kurse të shtunën do të kemi rikthimin e reshjeve intensive dhe vranësirave të dendura.
Në viset më larta malore nga e diela mund të kemi reshjet e para të dëborës edhe në Kosovë, kurse në Bosnjë dhe Hercegovinë dhe Mal të Zi reshjet e para të borës (në viset malore) priten nga e shtuna/Meteoballkan