Deri më sot kemi qenë nën ndikimin e masave ajrore të ngrohta nga Mesdheu për shkak të rrymimeve të forta ajrore nga jugu dhe jugperëndimi, ndërsa nga nesër do të kemi ndryshim në rrymimet ajrore dhe do të fillojnë të fryjnë erëra nga veriu dhe verilindja.
Për këtë arsye temperaturat do të shënojnë ulje, por nuk do të ketë ulje të theksuara të temperaturave.
Gjatë fundjavës në Mesdhe do të kemi një tjetër ciklon mjaft të fuqishëm i cili do të zhvillohet mes Italisë dhe Afrikes së veriut. Në këtë mënyrë do të fuqizohen rrymimet ajrore nga veriu dhe verilindja në drejtim të rajonit tonë duke ulur temperaturat dhe duke kushtëzuar edhe reshje bore sidomos në shumë vise të Kosovës-Malit të Zi dhe vise kodrinore-malore të Maqedonisë së Veriut dhe viset e larta malore të Shqipërisë.
Edhe pse priten ulje të temperaturave nën vlerat mesatare, prapë se prapë nuk pritet të kemi ndonjë skenar të vërtetë dimëror nëpër ulëtsira, por dimri është në fillimet e tij dhe ky dimër mund të jetë mjaft premtues për entuziastët e reshjeve të borës./MeteoBallkan