Java që po hymë do të jetë jashtëzakonisht interesante në aspektin meteorologjik. Dy ditët e para të javës do të kemi ajrin e nxehtë afrikan i cili do të kushtëzojë ngritje të theksuara të temperaturave. Po ashtu edhe lagështia relative ajrit do të jetë pak e lartë dhe i nxehti do të jetë pak i rëndë.
Nga e mërkura pritet të depërtojë një masë masive ajrore e paqëndrueshme nga Atlantiku e cila do të kushtëzojë krijimin e një cikloni mbi rajonin tonë. Ky ciklon do të shkaktojë destabilizim të fuqishëm të atmosferës dhe të gjitha kushtet për krijimin e stuhive të fuqishme të shiut do të jenë prezentë. Pra të mërkurën në tërë rajonin tonë (Shqipëri, Kosovë, Maqedoni Veriore, Mal të Zi) priten rrebeshe lokalisht mjaft të fuqishme shiu me vetëtima, bubullimë dhe breshër si dhe priten ulje të temperaturave. Kjo ulje e temperaturave do të ndjehet shumë më shumë në viset tona kontinentale, por shtrëngata me shi dhe bubullima do të përfshijnë edhe bregdetin shqiptar duke shkaktuar freskim të motit. Megjithatë në bregdet pritet përmirësim i motit pas kalimit të shtrëngatave eventuale. Vende-vende mund të ketë edhe vërshime.
Mot i paqëndrueshëm na pret edhe nga dita e enjte, me intervale kohore me diell dhe zagushi si dhe me zhvillime të fuqishme vranësirash të cilat do të kushtëzojnë rrebeshe lokale shiu me vetëtima dhe bubullimë. Në bregdet pritet përmirësim i motit, por nuk duhet përjashtuar edhe atje ndonjë stuhi kalimtare me vetëtima dhe bubullimë.
Ishte ky parashikimi javor i motit gjykuar sipas ecurive më të fundit sinoptike dhe nëse ka ndonjë ndryshim eventual do tu njoftojmë në postimet tona të përditshme./Meteoballkan
