Nga dita e shtunë do të kemi rritje të mëtutjeshme të temperaturave për shkak të situatës së favorshme sinoptike për depërtimin e masave mjaft të ngrohta ajrore me origjinë nga Afrika veriore.
Një Mesdhe perëndimor shumë aktiv me reshje dhe masa ajrore ciklonike dhe një anticiklon shumë solid mbi territoret tona dhe kjo është një kombinim i përkryer për masat ajrore të ngrohta nga jugu të vijnë direkt në viset tona.
Temperaturat do të shënojnë rritje të mëtutjeshme edhe në Shqipëri, por edhe në Kosovë dhe Maqedoninë Veriore. Normalisht netët dhe mëngjeset do të jenë mjaft të freskëta sepse tani kemi shkurtimin e orëve ditore dhe zgjatjen e orëve të natës apo orëve pa energji diellore.
Temperaturat maksimale në Kosovë mund të arrijnë deri në 23 apo ndoshta mund të ndodhë edhe 24 gradë Celsius sidomos të dielën në mesditë dhe krejt në fillim të javës së re, ndërsa në Maqedoninë Veriore deri në 25 apo 26 gradë Celsius e në Shqipëri deri në 27 gradë apo 28 gradë Celsius që është ekstrem për fundin e Tetorit.
Ndonjë përkeqësim të motit ende nuk kemi në horizont. Mund të ndodhë në fillim të Nëntorit, por mbetet enigmatike fuqia dhe natyra e ndryshimit të gjendjes sinoptike afër dates 4 Nëntor. Sigurisht se Nëntori parashihet të jetë një muaj mjaft dinamik në sensin e ndryshimeve më të shpeshta të motit./MeteoBallkan
