Në shumë pjesë të Republikës së Kosovës sot pasdite pritet aktivizim i atmosferës që do të thotë se priten zhvillime të vranësirave konvektive ose vertikale. Këto vranësira do të kushtëzojnë rrebeshe lokale shiu me vetëtima dhe bubullimë. Vende-vende mund të ketë ndonjë shtrëngatë të fuqishme kalimtare dhe breshër. Si zakonisht po duhet gjithnjë ta përsërisim se reshjet nuk do të kapin tërë territorin e Kosovës, por sipas disa parametrave më shumë reshje priten në veri, perëndim, juglindje dhe pjesë të qendrës së vendit. Është e pa mundur dhe nuk ka asnjë model dhe meteotolog që mundet me i parapa me saktësi 100% vendin dhe zhvillimin egzakt të një stuhie të izoluar, prandaj nëse japim lokacione ashtu siç shkruajnë modelet mund të dalin rezultate të ndryshme dhe asnjë përej tyre nuk mund të jetë 100% i saktë, prandaj sot sytë nga perëndimi dhe veriperëndimi. Nëse shihni vranësira të errëta dhe dëgjoni bubullima kah perëndimi dhe veriperëndimi atëherë stuhia fare lehtë mund të vijë drejt jush. Në mbrëmje vonë stabilizim dhe kthjellim i motit.
Rrebeshe lokale sot mund të ketë edhe në veri, lindje dhe juglindje të Shqipërisë si dhe në shumë vise të Maqedonisë së Veriut ku mund të ketë ndonjë shtrëngatë të fuqishme me breshër. Rrebeshe priten edhe në veri të Malit të Zi dhe disa vise në Luginën e Preshevës. Në Shqipëri vazhdon i nxehti ngase fronti shumë pak do të ndjehet atje, edhe pse priten ulje të përkohshme të temperaturave edhe në Shqipëri, por menjëherë temperaturat rriten ngase në Mesdhe kemi valën më të re dhe më të fuqishme të nxehtësisë afrikane.
Edhe këto reshje do të jenë kalimtare dhe të lokalizuara si dhe nuk do të ndikojnë shumë në zbutjen e thatësisë ekstreme, por fatmirësisht do të ndikojnë në uljen e përkohshme të temperaturave pas shumë ditëve dhe javëve të nxehtësisë afrikane, megjithatë përsëri priten rritja graduale të temperaturave dhe Afrika Veriore ende nuk ka mbaruar punë me ne./Meteoballkan