Ditët e freskëta që sollën temperatura më të këndshme krahasuar me valën e nxehtësisë së javëve të kaluara po kalojnë dhe tani radhën e kanë disa ditë mjaft të nxehta me temperatura afrikane.
Masa ajrore e thatë anticiklonike nga Mesdheu po e mer pushtetin në atmosferën mbi ne duke u mundësuar temperaturave të larta të deprtojnë dhe mbretërimit të rrezeve të nxehta diellore. Në Kosovë edhe sot ka vranësira lokale të herëpashershme të cilat sadopak kushtëzojnë mot më të freskët, por nga nesër vranësira do të ketë gjithnjë e më pak dhe njëkohësisht rrymimet e nxehta ajrore do të fuqizohen së bashku me rrezet diellore.
Gradualisht por sigurtë po krijohen kushte për valën e re të nxehtësisë së fortë në rajon ku temperaturat në Kosovë pritet të kulmojnë dy- tri ditët e ardhshme dhe ato maksimalet pritet të luhaten nga 33 deri në 36 gradë Celsius, ndërsa në rajon (Shqipëri-Maqedoni, Mal i Zi) deri në 38-39 gradë Celsius.
Në rajon mëgjerë pritet të jetë edhe më nxehtë si psh në Mosta temperatura pritet të arrijë deri në 42 gradë Celsius. 40 pritet të jetë në shumë vise të Kroacisë dhe Bosnjës ku do të jetë edhe baza e ajrit të “sertë” afrikan.
Në anën tjetër në Evropë vazhdojnë të përparojnë masa të freskëta dhe jashtëzakonisht jo-stabile ajrore nga Oqeani Atlantik të cilat në kontakt me ajrin e nxehtë afrikan pritet të kushzëzojnë një atmosferë jashtëzakonisht jo-stabile dhe dinamike. Priten rrebeshe të fuqishme shiu me vetëtima, bubullimë dhe breshër. Vende-vende priten shira të rrëmbyeshëm dhe mundësi për përmbytje masive. Më së shumti reshje priten në Zvicër dhe gjysmën jugore dhe lindore të Gjermanisë.
Disa nga këta masa ajrore jo-stabile depërtojnë nga pjesa e dytë e javës në Slloveni, Kroaci, Bosnjë dhe Serbi duke krijuar kushte për stuhi të fuqishme lokale me rrufe dhe breshër. Në Kosovë rrebeshe të izoluara mund të ketë të premtën, ndërsa të shtunën pritet ditë jo-stabile me rrebeshe lokalisht të fuqishme shiu me vetëtima dhe bubullimë. Edhe pse mund të kemi rrebeshe temperaturat nuk pritet të pësojnë ulje të mëdha./Meteoballkan